Albin Kurti, kryeministër i Kosovës, zhvilloi një takim me Ekipin e Kombeve të Bashkuara në Kosovë (UNKT), të udhëhequr nga Koordinatori për Zhvillim i OKB-së, Stephen O’Malley.
Gjatë takimit u diskutuan prioritetet e Planit Strategjik të UNKT 2026–2030 dhe forcimi i bashkëpunimit ndërmjet Qeverisë së Kosovës dhe OKB-së. Të dyja palët riafirmuan përkushtimin e përbashkët për avancimin e prioriteteve zhvillimore të vendit dhe zbatimin e Agjendës 2030.
Kurti theksoi rëndësinë që prioritetet e UNKT-së të jenë në përputhje me agjendën kombëtare të zhvillimit. Ai mirëpriti vazhdimësinë e bashkëpunimit dhe vuri në dukje përfshirjen e Kosovës përmes bashkëfinancimit në programet e OKB-së.
UNKT prezantoi prioritetet për vitin 2026 dhe ritheksoi gatishmërinë për të mbështetur Qeverinë në zbatim dhe aspekt normativ. Vëmendje e veçantë iu kushtua fushave ku agjencitë e OKB-së mund të kontribuojnë në forcimin e kapaciteteve institucionale dhe avancimin e reformave.
Të dyja palët u dakorduan për vazhdim të bashkëpunimit të ngushtë dhe forcim të mekanizmave të koordinimit për mbështetjen e zhvillimit dhe reformave institucionale në Kosovë.