Kryeministri i Kosovës, Albin Kurti, priti në Zyrën e Kryeministrisë në Prishtinë ministren e Europës dhe Punëve të Jashtme të Shqipërisë, Elisa Spiropali, më 25 shkurt 2026.
Në një postim në rrjetet sociale, Kurti njoftoi se hekurudha Gjakovë-Shkodër, në kuadër të projektit Prishtinë-Durrës, do të jetë prioritet i këtij mandati. Ai theksoi synimin për nisjen sa më parë të punimeve, duke e vlerësuar si investim strategjik në infrastrukturën hekurudhore. Ky projekt pritet të forcojë lidhjet ekonomike mes Kosovës dhe Shqipërisë, të rrisë qarkullimin e mallrave dhe njerëzve, si dhe të kontribuojë në zhvillimin rajonal.
Gjatë takimit u diskutua vazhdimi i mbledhjeve të përbashkëta ndërqeveritare gjatë vitit 2026. Palët theksuan nevojën për koordinim më të madh në politikën e jashtme dhe mbështetje reciproke në forume ndërkombëtare.
Një temë tjetër e rëndësishme ishte bashkëpunimi për diasporën shqiptare, veçanërisht promovimi i gjuhës dhe kulturës te gjeneratat e reja. Të dy palët u dakorduan se diaspora mbetet faktor kyç për zhvillimin ekonomik, diplomatik dhe kulturor të vendeve.
Vizita e Spiropalisë në Kosovë
Elisa Spiropali zhvilloi vizitën e parë në Kosovë që nga formimi i ekzekutivit të ri. Ajo u takua me homologun Glauk Konjufca, presidenten Vjosa Osmani, kryeparlamentaren Albulena Haxhiu dhe liderët e opozitës. Ministrja bëri të ditur se Kosova është prioritet absolut i politikës së jashtme të Shqipërisë dhe paralajmëroi mbajtjen sivjet të mbledhjes së përbashkët qeveritare.
Mbledhja e fundit ndërqeveritare u mbajt para katër vitesh, ndërsa ajo e planifikuar më 14 qershor 2023 u anulua nga Qeveria e Shqipërisë.