Ministrja për Evropën dhe Punët e Jashtme e Shqipërisë, Elisa Spiropali, pas takimit me kryeministrin e Kosovës, Albin Kurti, deklaroi se hapi i radhës në bashkëpunimin dypalësh është mbledhja e përbashkët e qeverive të udhëhequra nga Edi Rama dhe Albin Kurti.
Spiropali e cilësoi takimin përmbajtësor dhe theksoi diskutimin për projekte transformuese, jo simbolike. Midis tyre përmenden hekurudha kuq e zi, korridoret energjetike, si dhe thellimi i bashkëpunimit në arsim, kulturë, siguri, diplomaci dhe fusha të tjera me interes të përbashkët.
Ajo shpjegoi se mbledhja e qeverive do të ketë në fokus projekte konkrete, me afate dhe përgjegjësi të qarta. Gjithashtu, Spiropali uroi Kurtin për rezultatin zgjedhor dhe për konstituimin e shpejtë të institucioneve të reja në Kosovë.
“Në një kohë kur rajoni dhe Europa përballen me pasiguri, fakti që Kosova formoi në kohë Kuvendin dhe Qeverinë është shenjë stabiliteti dhe maturie institucionale. Stabiliteti nuk është luks. Është kusht për vendimmarrje të qartë – në proceset e brendshme, në dialog dhe në rrugën e integrimit”, tha ajo.
Spiropali u zotua se Shqipëria do të qëndrojë përkrah Kosovës jo vetëm me solidaritet, por me angazhim të përditshëm dhe vizion afatgjatë. “Sepse zëri ynë është më i fortë kur është i përbashkët”, përfundoi ajo në postimin në Facebook.