Kryeministri i Republikës së Kosovës, Albin Kurti, mirëpriti në takim anëtarin e Dhomës së Lordëve, Lord Cromwell, dhe deputetin e Parlamentit të Mbretërisë së Bashkuar, Martin Vickers.
Zyrtarët britanikë uruan kryeministrin Kurti dhe popullin e Kosovës për 18-vjetorin e Pavarësisë, të shënuar dje më 17 shkurt, si dhe e përgëzuan për mandatin e tij të ri qeverisës.
Gjatë bisedës u diskutua për marrëdhëniet bilaterale ndërmjet Kosovës dhe Mbretërisë së Bashkuar, me theks në bashkëpunimin ekonomik dhe tregtar, si dhe në mundësitë që Kosova ofron për investime dhe investitorë të huaj. Pjesë e diskutimit ishte edhe siguria në rajon dhe në kontinent.
Kryeministri Kurti i falënderoi mysafirët për vizitën dhe urimet, si dhe për bashkëpunimin dhe angazhimin e tyre në fuqizimin e marrëdhënieve ndërmjet dy vendeve. Ai shprehu mirënjohje për rolin historik dhe kontributin e çmueshëm të Mbretërisë së Bashkuar në çlirimin, pavarësimin, shtetndërtimin dhe zhvillimin e Kosovës.
Kurti theksoi prioritetet e Qeverisë për mandatin e ri, veçanërisht projektet e mëdha infrastrukturore, investimet kapitale që do të tejkalojnë vlerën prej 1 miliard euro në vit, si dhe investimet në siguri dhe mbrojtje.