Albin Kurti, kryeministër i Kosovës, ka përmbyllur vizitën zyrtare dy-ditore në Londër, e cila është e dyta brenda gjashtë muajsh. Në një postim në rrjete sociale, ai bëri një përmbledhje të takimeve të zhvilluara dhe e cilësoi Mbretërinë e Bashkuar si partner kyç strategjik për Kosovën.
Gjatë ditës së parë, Kurti u takua me Sekretaren për Punë të Jashtme të Mbretërisë së Bashkuar, Yvette Cooper. Në këtë takim, shprehu mirënjohjen për mbështetjen e vazhdueshme britanike ndaj Kosovës. Ai theksoi marrëdhëniet e ndërtuara mbi vlera demokratike të përbashkëta dhe përkushtim për sigurinë dhe prosperitetin, si dhe ritheksoi angazhimin për thellimin e bashkëpunimit dypalësh.
Më pas, u takua me presidenten e Bankës Evropiane për Rindërtim dhe Zhvillim, Odile Renaud-Basso, duke e falënderuar për mbështetjen e konsiderueshme financiare. Diskutuan vazhdimin e ndihmës për sektorin privat në rritje dhe projekte infrastrukturore si energjia, uji dhe transporti publik.
Kurti mori pjesë në një panel të organizuar nga think tank-u ODI Global, ku diskutohet shtetndërtimi ekonomik dhe stabiliteti global, së bashku me drejtoreshën ekzekutive Sara Pantuliano, Dora Meredith dhe analistin ekonomik Martin Wolf nga Financial Times. Në mbrëmje, ai ishte i ftuar në një darkë të shtruar nga Ministri i Shtetit për Mbrojtje, Lord Coaker, në Naval and Military Club, ku u trajtuan çështje bashkëpunimi në mbrojtje dhe siguri.
Ditën e dytë të vizitës
Kurti mori pjesë në një panel në London Defence Conference, ku theksoi rëndësinë e gatishmërisë në kohë krizash globale. Në panel ishin edhe Karen Pierce, Pat Harrigan, Onno Eichelsheim dhe Julian Lindley-French. Pas panelit, ai zhvilloi një intervistë me Iain Martin, ku foli për rrugën e Kosovës drejt Bashkimit Evropian dhe sfidat e sigurisë nga Serbia.
Vizita u përmbyll me një takim me historianin e njohur Sir Noel Malcolm.