Albin Kurti, kryeministër në detyrë i Kosovës, zhvilloi një takim bilateral me Andrej Plenković, kryeministër i Kroacisë, në kuadër të Samitit të Komunitetit Politik Evropian në Jerevan të Armenisë.
Në njoftimin për media të Zyrës së Kryeministrit të Kosovës theksohet se u vlerësuan marrëdhëniet shumë të mira ndërmjet Kosovës dhe Kroacisë, të ndërtuara mbi partneritet të qëndrueshëm, miqësi të sinqertë dhe bashkëpunim të gjithanshëm.
Kurti shprehu mirënjohjen për mbështetjen e vazhdueshme të Kroacisë ndaj Kosovës, veçanërisht në proceset e integrimit euro-atlantik dhe forcimin e subjektivitetit ndërkombëtar të vendit.
Bashkëbisedimi u përqendrua gjithashtu në zhvillimet aktuale në kontinentin evropian dhe përtej tij, si dhe në rëndësinë e bashkëpunimit ndërmjet shteteve që ndajnë vlera të përbashkëta demokratike.
Në këtë kontekst u theksua nevoja për forcimin e aleancave dhe koordinimin politik në funksion të paqes, sigurisë dhe stabilitetit afatgjatë.