Albin Kurti, kryeministër në detyrë i Republikës së Kosovës, zhvilloi takim me Përfaqësuesen e Lartë të Bashkimit Evropian për Punë të Jashtme dhe Politikë të Sigurisë si dhe zëvendëspresidente të Komisionit Evropian, Kaja Kallas, në margjina të Samitit të Komunitetit Politik Evropian në Jerevan më 4 maj.
Gjatë takimit u diskutua situata politike në rajon dhe çështjet e sigurisë në kontekstin e sfidave ndërkombëtare të ndërlidhura. Kurti theksoi rëndësinë e linjëzimit me Bashkimin Evropian për adresimin e këtyre sfidave dhe avancimin e integrimit evropian të Kosovës.
Ai rikonfirmoi përkushtimin e Kosovës për agjendën e reformave dhe kërkoi statusin e vendit kandidat për anëtarësim në BE, duke nënvizuar progresin e arritur dhe nevojën për trajtim të drejtë të bazuar në meritë.
U bisedua gjithashtu për zhvillimet e fundit politike në Kosovë, përfshirë zbatimin e ligjit për të huajt dhe dakordimin e datës 14 mars, i cili u vlerësua si momentum i ri dhe pozitiv.
Temë tjetër ishte procesi i dialogut ndërmjet Kosovës dhe Serbisë, si dhe çështja e shqiptarëve në Preshevë, Medvegjë dhe Bujanoc. Kurti ngriti shqetësimet për pasivizimin e adresave dhe pamundësimin e mbështetjes financiare për Luginën nga Qeveria e Kosovës.
Takimi u zhvillua në frymë konstruktive dhe shërbeu për shkëmbim pikëpamjesh mbi temat me interes të përbashkët, duke riafirmuar bashkëpunimin e ngushtë ndërmjet Kosovës dhe Bashkimit Evropian.