Albin Kurti, kryeministri i Kosovës, priti të hënën në Prishtinë Peter Sorensenin, përfaqësuesin e posaçëm të Bashkimit Evropian për dialogun Kosovë–Serbi.
Emisari evropian e uroi kryeministrin për formimin e qeverisë së re dhe fillimin e mandatit të tij të ri. Gjatë takimit u bisedua për zhvillimet e fundit politike në vend, forcimin e sundimit të ligjit dhe përparimin e Kosovës në procesin e integrimit evropian, të cilat u theksuan si prioritete të agjendës qeveritare.
Në fokus ishte procesi i dialogut të ndërmjetësuar nga Bashkimi Evropian. Qeveria e Kosovës rikonfirmoi përkushtimin për normalizim të plotë të marrëdhënieve me Serbinë përmes një marrëveshjeje ligjërisht të detyrueshme që garanton njohje reciproke.
Peter Sorensenin e pritën gjithashtu ministri i Jashtëm Glauk Konjufca. Ai u njoftua se Ministria e Jashtme e Kosovës do të jetë përgjegjëse për dialogun me Serbinë.
Përditësime
Glauk Konjufca diskutoi me Peter Sørensen të BE-së mbi momentumin aktual të dialogut Kosovë-Serbi. Të dy palët shkëmbyen pikëpamje për qasjen dhe parimet e një procesi më efektiv e të qëndrueshëm. Konjufca theksoi se dialogu ofron mundësi për përmirësimin e marrëdhënieve fqinjësore me Serbinë, si dy shtete sovrane drejt integrimit evropian.
Peter Sørensen, Përfaqësuesi Special i BE-së për Dialogun Kosovë-Serbi, shkroi në X: «Vizitova Kosovën për diskutime të mira me kryeministrin Albin Kurti dhe ministrin e ri të Jashtëm, Glauk Konjufca. U përqendruam në avancimin e normalizimit të marrëdhënieve me Serbinë, zbatimin e angazhimeve dhe sigurimin e stabilitetit dhe progresit në rrugën evropiane.»
Kryeministri Albin Kurti shkroi në X: «Dje prita Përfaqësuesin Special të BE-së për Dialogun Kosovë-Serbi, Peter Sørensen. Diskutuam për rrugën e integrimit evropian të Kosovës, sundimin e ligjit dhe procesin e dialogut të lehtësuar nga BE-ja. Ne mbetemi të përkushtuar për normalizimin e plotë të marrëdhënieve me Serbinë përmes njohjes reciproke.»