Kurti takohet me Sørensenin për dialogun Kosovë-Serbi

Kryeministri në detyrë i Republikës së Kosovës, Albin Kurti, priti të mërkurën në takim Përfaqësuesin e Posaçëm të Bashkimit Evropian për Dialogun Kosovë–Serbi, Peter Sørensen. Ky ishte takimi i parë pas zgjedhjeve të 28 dhjetorit.

Në njoftimin e Zyrës së Kryeministrit thuhet se Kurti theksoi se rezultati zgjedhor ka prodhuar një legjitimitet të ri demokratik, i cili garanton parashikueshmëri politike dhe stabilitet institucional, duke forcuar funksionimin e rendit kushtetues të Kosovës. Ky legjitimitet, i dalë drejtpërdrejt nga vullneti i qytetarëve, siguron përfaqësim të drejtë, kredibil dhe parimor të Kosovës në dialog. Kurti vlerësoi se e njëjta gjë nuk mund të thuhet për lidershipin në Serbi.

Kurti shprehu gatishmërinë e Kosovës për normalizim të plotë të marrëdhënieve me Serbinë dhe dialog konstruktiv në Bruksel. Ai theksoi rëndësinë thelbësore të këtyre kushteve:

• tërheqjes së letrës së ish-kryeministres serbe Ana Brnabiq, të deponuar në Shërbimin Evropian për Veprim të Jashtëm (EEAS);
• dorëzimit të Milan Radoiçiqit, për të cilin Prokuroria e Republikës së Kosovës ka ngritur aktakuzë me 160 faqe;
• nënshkrimit të Marrëveshjes Bazike dhe Aneksit të Zbatimit si garanci juridike dhe mirëbesim.

Kurti nënvizoi se me zbatimin e plotë të Marrëveshjes së Brukselit dhe Aneksit të Zbatimit të Ohrit, dialogu prodhon rezultate të qëndrueshme.

Në një deklaratë të shkurtër për media, Sørensen u pyet për këto kushte dhe tha se kur Përfaqësuesja e Lartë e BE-së ta thërrasë takimin në kohën e duhur, njerëzit do të vijnë.