Albin Kurti, Kryeministri i Kosovës, i shoqëruar nga bashkëpunëtorë, mbrëmë priti në darkë pune Peter Sorensenin, Përfaqësuesin e Posaçëm të Bashkimit Evropian për Dialogun Kosovë-Serbi.
Në darkë u diskutua për procesin e integrimit të Kosovës në Bashkimin Evropian, përfshirë linjëzimin e plotë të politikës së jashtme me bllokun 27-anëtarësh si përcaktim strategjik, si dhe angazhimin e Kosovës në përmbushjen e reformave. Në kontekst të integrimit evropian, palët trajtuan edhe procesin e anëtarësimit në Këshillin e Evropës.
Kurti dhe Sorenseni biseduan po ashtu për aktualitetet politike dhe zhvillimet e brendshme në Kosovë.
Sipas njoftimit të Kryeministrisë, në takim ishte i pranishëm Besnik Bislimi, ish-kryenegociatori i Kosovës në dialogun me Serbinë. Ndërsa nuk ishte i pranishëm Jeton Zulfaj, i emëruar kohët e fundit si kryenegociator i Kosovës për integrimin evropian, duke zëvendësuar Bislimin. Zulfaj ka shërbyer si këshilltar politik i Kurtit që nga marsi i vitit 2021.