Kryeministri në detyrë i Kosovës, Albin Kurti, vizitoi të shtunën Shtëpinë Muze në Krushë e Madhe me rastin e 27-vjetorit të zhdukjes së veprimtarit dhe intelektualit Ukshin Hoti. Ai u shoqërua nga djali i Hotit, ministri për Punë, Familje dhe Vlera të Luftës Çlirimtare, Andin Hoti.
Kurti deklaroi se Ukshin Hoti ishte një mendje jashtëzakonisht e ndritur e shqiptarëve dhe se teoritë e tij politike kanë vlerë universale. Ai kujtoi me dhimbje ditën e 16 majit 1999, kur Hoti u lirua nga burgu i Dubravës dhe më pas u zhduk pa gjurmë.
Sipas Kurtit, Qeveria e Kosovës ka marrë vendim për botimin e veprave të Hotit. Ai theksoi se materiale dhe dokumente po mblidhen nga qytete të ndryshme, përfshirë Beogradin, Zagrebin dhe Universitetin Harvard, ku Hoti kishte studiuar. Kurti shtoi se veprat duhet të rilexohen, pasi vetëm rileximi i tyre përbën lexim të vërtetë.