Rritja e çmimit të naftës ka shqetësuar tejmase qytetarët e Kosovës.
Shefi i Grupit Parlamentar të AAK-së, Besnik Tahiri, dorëzoi kërkesë në Ministrinë e Tregtisë për marrjen e masave urgjente kundër situatës ekonomike të krijuar nga rritja e shpejtë e çmimeve të karburanteve.
Në këtë kërkesë sugjerohen katër masa urgjente që Qeveria e Kosovës duhet t'i zbatojë për të shmangur pasojat ekonomike nga shtrenjtimi i derivateve. Tahiri kishte kritikuar ashpër qeverinë një ditë më parë për pasivitetin lidhur me rritjen e çmimeve të derivateve.
Ministrja e Industrisë, Ndërmarrjeve, Tregtisë dhe Inovacionit (MINTI), Mimoza Kusari-Lila, u deklarua në një konferencë për shtyp. Ajo u shpreh se lirimi i TVSH-së për derivate dhe heqja e përkohshme e akcizës nuk mund të ndodhin.
Kusari-Lila theksoi se institucioni që drejton po përpiqet që çmimet të mos rriten më tej. Ministrja shtoi se ulje e çmimeve mund të ndodhë nëse reflektohet edhe në tregjet ndërkombëtare.