Ministrja në detyrë e Ministrisë së Industrisë, Ndërmarrësisë, Tregtisë dhe Inovacionit, Mimoza Kusari-Lila, ka njoftuar marrjen e dy vendimeve kryesore me qëllim mbrojtjen e industrisë vendore dhe sigurimin e konkurrencës së drejtë në tregun e Kosovës. Masat prekin drejtpërdrejt importet me origjinë nga Serbia.
Lidhur me farën e grurit, ministrja bëri të ditur se më 4 qershor 2026 është marrë vendimi për fillimin e një hetimi zyrtar anti-dumping. Ky hap ndërmerret pas ankesave të kompanive vendore, të cilat kanë shprehur dyshime se ky produkt po shitet me çmime nën koston reale. Hetimi po zhvillohet në përputhje me legjislacionin në fuqi, ku pas analizave nga Departamenti i Tregtisë dhe konsultimeve me Komisionin për Vlerësimin e Detyrimeve të Veçanta në Importe, mund të vendosen detyrime të përkohshme anti-dumping brenda një periudhe prej 60 ditësh deri në 9 muaj.
Njëkohësisht, ministrja Kusari-Lila njoftoi vendosjen e kufizimeve sasiore për importin e aluminit dhe artikujve prej alumini nga Serbia. Sipas saj, këto vendime mbështeten në analiza statistikore dhe janë ndërmarrë për të garantuar që prodhimi vendor të mos dëmtohet nga importet e sasisë së madhe dhe me cilësi të dyshuar.
Përditësime
Departamenti i Tregtisë ka identifikuar indikacione për praktika damping pas një verifikimi paraprak të kërkesës. Procedura mbështetet në nenin 27 të Ligjit për Masat Antidamping dhe Masat Kundërbalancuese.
Ministrja Mimoza Kusari-Lila nënshkroi vendimin për vendosjen e një detyrimi të përkohshëm antidamping prej 0.04 euro për kilogram për farën e grurit me origjinë nga Serbia. Ky hap konkretizon hetimin e nisur më herët dhe synon mbrojtjen e prodhuesve vendorë nga praktikat e padrejta të tregut.