Gjykata Kushtetuese vendosi më 23 tetor të mos e kalojë për shqyrtim në seancë plenare kërkesën e Aleksandër Lahos, i njohur si “Rrumi i Shijakut”, për shfuqizimin e vendimit të Gjykatës së Lartë. Ky vendim la në fuqi dënimin e tij me dy vite burg, ndaj kërkesa për rigjykim nuk u pranua.
Laho pretendonte se vendimi i Kolegjit Penal të Gjykatës së Lartë ishte në kundërshtim me Kushtetutën. Më 23 korrik 2025, Gjykata e Posaçme e Apelit e dënoi me tre vite burg për korrupsion aktiv ndaj personave që ushtrojnë funksione publike, të kryer në bashkëpunim. Për shkak të gjykimit të shkurtuar, dënimi u ul në dy vite. Çështja lidhej me tjetërsimin e 45 mijë metrave katrorë tokë publike në Gjirin e Lalzit.
Hetimi për pronat në Durrës
Në qershor 2025, SPAK përfundoi hetimet dhe dërgoi për gjykim një çështje tjetër ndaj Lahos dhe shtatë personave të tjerë, të dyshuar për përfshirje në një skemë të organizuar të tjetërsimit të pronave shtetërore në Durrës. Sipas SPAK-ut, Laho dhe vëllai i tij, Vullnet Muça, dyshohet se krijuan një grup të strukturuar kriminal, ku përfshiheshin edhe zyrtarë të Kadastrës.
Laho akuzohet se i dha 600 mijë lekë zyrtarit të Avokaturës së Shtetit, Irgen Kërçuku, dhe i premtoi edhe 300 mijë lekë, që ky i fundit të mos apelonte një çështje pronësie lidhur me tokën në Gjirin e Lalzit. Padia për këtë çështje u depozitua në organin e akuzës nga Pal Seçuni, i cili kundërshtonte vendimet e Hipotekës së Durrësit për tjetërsimin e pronës.
Lidhja me atentatin ndaj Arjan Ndojës
Emri i Lahos është përmendur edhe në atentatin e vitit 2019 ndaj ish-prokurorit Arjan Ndoja, ku Laho mbeti i plagosur. Pas ngjarjes, atij iu sekuestrua telefoni. Sipas raportimeve, në të u gjet një video ku ai komunikonte me një zyrtar të Avokaturës së Shtetit për çështjen e pronësisë në Gjirin e Lalzit.