Gjykata Kushtetuese njoftoi se po bën maksimumin për të përgatitur zbardhjen e vendimit për pezullimin e Belinda Ballukut nga posti i zëvendëskryeministres dhe ministres së Infrastrukturës dhe Energjitikës.
Gjatë seancës sotme, ku u shqyrtua ankimimi për pagat e gjyqtarëve, Kushtetuesja premtoi ta përfundojë vendimin e zbardhur para skadimit të afatit 30-ditor.
Vendimi i marrë më parë nga Gjykata Kushtetuese, me votim 4 me 4 nga gjyqtarët, rrëzoi ankimimin e kryeministrit Edi Rama. Ai kishte kërkuar rrëzimin e vendimit të Gjykatës së Posaçme për pezullimin e Ballukut nga detyrat.
Kjo lë në fuqi pezullimin e saj. Më pas, kryeministri Edi Rama e cilësoi vendimin si precedent të rrezikshëm dhe njoftoi ndërhyrje në legjislacion. Qëllimi është që anëtarët e kabinetit qeveritar të mos pezullohen më me vendime gjykatash.