Kuvendi i Kosovës mban sot, më 27 prill, në orën 17:00, seancë të jashtëzakonshme për diskutim në lidhje me zgjedhjen e presidentit të ri të Republikës. Njoftimin e ka bërë kryetarja e Kuvendit, Albulena Haxhiu. Seanca vjen një ditë para skadimit të afatit kushtetues për zgjedhjen e kreut të shtetit.
Deputetët e legjislaturës së dhjetë kanë afat deri më 28 prill për të zgjedhur presidentin. Në të kundërt, sipas vendimit të Gjykatës Kushtetuese, vendi shkon automatikisht në zgjedhje të reja, të cilat mbahen brenda 45 ditësh. Për zgjedhjen e presidentit kërkohen 80 vota në dy rundat e para, ndërsa në rundën e tretë mjafton 61 vota, por nevojiten 80 deputetë në sallë për të mbajtur seancën.
Negociatat mes partive
Gjatë fundjavës, Lëvizja Vetëvendosje në pushtet i kërkoi Partisë Demokratike të Kosovës dhe Lidhjes Demokratike të Kosovës të paraqesin nga tre propozime për president, duke specifikuar se duhet të jenë figura unifikuese dhe jopartiake. LVV kishte kandiduar më parë ministrin e Jashtëm Glauk Konjufca dhe deputeten Fatmire Mulhaxha-Kollçaku, por premtoi t'i tërheqë nëse opozita sjell emrat e kërkuar.
PDK-ja refuzoi ofertën. Kryetari i saj, Bedri Hamza, e cilësoi atë si “joserioze”, duke thënë se partitë janë subjekte të ndryshme politike.
LDK-ja shprehu gatishmëri të kufizuar. Kreu i saj, Lumir Abdixhiku, tha se mund ta propozojë ish-presidenten Vjosa Osmanin, me kusht që LVV të garantojë 66 vota për të. LDK ka 15 ulëse në Kuvend.
Shefja e grupit parlamentar të LVV-së, Arbërie Nagavci, deklaroi se nuk kanë marrë ende propozime konkrete dhe zyrtare nga PDK apo LDK. Partitë nuk kanë arritur marrëveshje deri tani.