Partia Demokratike e Kosovës (PDK) përshëndet dhe falënderon deputetët e Kuvendit të Republikës së Kosovës për miratimin e rezolutës në mbrojtje të të drejtave të çlirimtarëve në Hagë, përfshirë Hashim Thaçi, Kadri Veseli, Jakup Krasniqi, Rexhep Selimi dhe të tjerëve.
Rezoluta, e hartuar nga ekspertë të pavarur, u fut në rend dite dhe u votua në seancën e parë të legjislaturës së X-të të Kuvendit, pas kërkesës së Grupit Parlamentar të PDK-së. Ajo shënon një moment institucional dhe kombëtar, duke theksuar përkushtimin për një proces të drejtë, të paanshëm dhe në përputhje me standardet kushtetuese e ndërkombëtare.
Rezoluta kërkon nga Dhomat e Specializuara dhe Zyra e Prokurorit të Specializuar të sigurojnë respektimin e plotë të standardeve ndërkombëtare dhe kushtetuese, transparencën, llogaridhënien dhe kultivimin e besimit publik në drejtësi. Ajo konfirmon zotimin e institucioneve të Kosovës për të mbështetur të drejtën e mbrojtjes së udhëheqësve dhe luftëtarëve të Ushtrisë Çlirimtare të Kosovës (UÇK), përfshirë mbështetjen financiare.
Sipas PDK-së, rezoluta rikonfirmon respektimin e rendit kushtetues, përfshirë Amendamentin Nr. 24 të Kushtetutës, si dhe domosdoshmërinë e zbatimit të standardeve për gjykim të drejtë dhe mbrojtjen e të drejtave të të akuzuarve.
PDK e konsideron këtë votim një akt përgjegjësie shtetërore dhe uniteti institucional, që tejkalon përkatësitë partiake. Partia premton të vazhdojë si gardiane të Kushtetutës, të vlerave të UÇK-së dhe të drejtësisë së paanshme.