Kuvendi i Kosovës ratifikoi të enjten një sërë marrëveshjesh ndërkombëtare, të cilat kapin vlerën e miliona eurove. Ratifikimi erdhi pas vonesave nga pezullimi i punës së Kuvendit gjatë marsit, për shkak të vendimit të Gjykatës Kushtetuese, që rrëzoi dekretin e presidentes Vjosa Osmani për shpërndarjen e legjislaturës së dhjetë.
Këto marrëveshje kërkojnë votat e 2/3 të deputetëve në Kuvendin me 120 vende. Ato u miratuan me mbështetjen e Lëvizjes Vetëvendosje, Lidhjes Demokratike të Kosovës, Aleancës për Ardhmërinë e Kosovës dhe një pjese të pakicave. Deputetët e Partisë Demokratike të Kosovës braktisën sallën paraprakisht, si shenjë pakënaqësie ndaj mosfutjes së një rezolute si pikë e parë e rendit të ditës.
Vlera e katër prej këtyre marrëveshjeve arrin 121 milionë euro. Ndër to spikat marrëveshja e kredisë mes Kosovës dhe Bankës Evropiane për Investime për projektin “Energjia Diellore Fotovoltaike” në Korporatën Energjetike të Kosovës (KEK), në vlerë 33 milionë eurosh. Ky projekt parashikon ndërtimin e një centrali diellor me kapacitet deri në 100 megavatë, që do të prodhojë rreth 169 gigavatëorë energji elektrike në vit, do të rrisë pjesën e energjisë së rinovueshme dhe do të ulë varësinë nga qymyrri si dhe emetimet e dyoksidit të karbonit.
Marrëveshjet e ratifikuara
- Marrëveshja për qasje në arsimin e lartë dhe pranim për studime në Ballkanin Perëndimor.
- Marrëveshja financiare ndërmjet Kosovës dhe Bashkimit Evropian për Programin IPA 2018.
- Marrëveshja financiare ndërmjet Kosovës dhe Bashkimit Evropian për Programin IPA 2017.
- Marrëveshja e kredisë me Bankën Evropiane për Investime për Projektin Energjia Diellore Fotovoltaike në KEK.
- Marrëveshja e kredisë me Bankën Evropiane për Rindërtim dhe Zhvillim (BERZh) për efiçiencën e energjisë në ndërtesa publike.
- Marrëveshja e kredisë shtesë për “Projekti i Rrugës me Shpejtësi të Lartë Prishtinë – Mitrovicë” me Fondin Saudit për Zhvillim.
Banka Evropiane për Investime kishte deklaruar se ratifikimi është i nevojshëm për ofrimin e financimit dhe përparimin e tranzicionit të gjelbër të Kosovës.