Kuvendi i Kosovës miratoi shtatë marrëveshje ndërkombëtare në seancën plenare të 2 prillit 2026. Votimi u bë me 81 vota pro, pa asnjë kundër ose abstenim, me mbështetje nga deputetët e mazhorancës, LDK-së dhe AAK-së.
Deputetët e PDK-së nuk ishin të pranishëm në votim, ndërsa ata të Listës Serbe nuk morën pjesë.
Marrëveshjet e ratifikuara
- Amendamenti nr. 3 i Marrëveshjes Financiare me Bashkimin Evropian për Programin IPA 2018 (Projektligji nr. 10/L-009).
- Amendamenti nr. 2 i Marrëveshjes Financiare me Bashkimin Evropian për Programin IPA 2017 (Projektligji nr. 10/L-010).
- Marrëveshja e Kredisë me Bankën Evropiane për Investime për Projektin e Energjisë Diellore Fotovoltaike në KEK – Porta Globale (Projektligji nr. 10/L-011).
- Marrëveshja e Kredisë me Bankën Evropiane për Rindërtim dhe Zhvillim (BERZh) për efiçencën e energjisë në ndërtesa publike (Projektligji nr. 10/L-012).
- Marrëveshja e Kredisë (kredi shtesë) me Fondin Saudit për Zhvillim për Projektin e Rrugës me Shpejtësi të Lartë Prishtinë – Mitrovicë (Projektligji nr. 10/L-013).
- Marrëveshja e Kredisë me BERZh për Impiantin e Trajtimit të Ujërave të Zeza në Podujevë (Projektligji nr. 10/L-014).
- Marrëveshja e Kredisë me Asociacionin Ndërkombëtar për Zhvillim për Zhvillimin e Sektorit Financiar të Kosovës.
Sipas Vetëvendosjes, katër nga këto marrëveshje janë kredi në vlerë totale 121 milionë euro.