Kuvendi i Serbisë ka nisur seancën për shqyrtimin e mocionit të mosbesimit ndaj Qeverisë, në të cilën po marrin pjesë kryeministri Gjuro Macut dhe anëtarët e kabinetit të tij. Mocioni u dorëzua nga 62 deputetë të opozitës në muajin shkurt të këtij viti.
Sipas Mirosllav Alleksiqit, kryetar i grupit parlamentar të Lëvizjes Popullore të Serbisë (NPS), shkaku kryesor i këtij veprimi është afera rreth ish-kompleksit të Shtabit të Përgjithshëm të Ushtrisë Jugosllave. Hetimet e Prokurorisë për Krimin e Organizuar janë përqendruar te ministri i Kulturës, Nikolla Sellakoviq, dhe tre zyrtarë të tjerë, të cilët akuzohen për falsifikim të dokumenteve. Këto veprime dyshohet se synonin heqjen e statusit të monumentit të mbrojtur nga ky kompleks, për t'i hapur rrugë ndërtimit të një projekti luksoz, nga i cili më vonë u tërhoq investitori Jared Kushner, dhëndri i ish-presidentit amerikan Donald Trump.
Ndonëse mocioni u dorëzua nga opozita, seanca u caktua zyrtarisht më 24 korrik, pas kërkesës së 109 deputetëve të koalicionit qeverisës. Më parë, shumica parlamentare kishte refuzuar disa herë të siguronte kuorumin e nevojshëm për mbajtjen e saj.
Nëse Kuvendi miraton mocionin, do të fillojë procesi për krijimin e një qeverie të re brenda një afati prej 30 ditësh. Në të kundërt, parlamenti do të shpërndahet dhe do të shpallen zgjedhje të reja parlamentare. Presidenti i Serbisë, Aleksandar Vuçiq, ka paralajmëruar më herët se zgjedhjet parlamentare do të mbahen në tetor ose nëntor. Këto zhvillime pasojnë kërkesat e vazhdueshme të studentëve, të cilët prej një viti kërkojnë zgjedhje të parakohshme pas tragjedisë në stacionin hekurudhor në Novi Sad, ku humbën jetën 16 persona.