Kuvendi Komunal i Gjilanit ka miratuar propozimin e Drejtorisë për Shëndetësi dhe Mirëqenie Sociale për subvencionimin e punësimit të personave me aftësi të kufizuara. Vendimi u mor me mbështetjen e kryetarit të komunës, Alban Hyseni, dhe u miratua unanimisht.
Drejtoresha e Drejtorisë për Shëndetësi dhe Mirëqenie Sociale, Mimoza Kadriu Qerimi, ka sqaruar se programi parasheh punësim njëvjeçar me gjysmë orari, përkatësisht katër orë pune në ditë. Ai synon krijimin e mundësive të reja për punësim, rritjen e përfshirjes sociale dhe ekonomike të kësaj kategorie, si dhe mbështetjen e bizneseve lokale që punësojnë persona me aftësi të kufizuara.
Sipas Mimoza Kadriu Qerimi, programi pritet të ndikojë drejtpërdrejt në uljen e papunësisë dhe në ndërtimin e një shoqërie më gjithëpërfshirëse. Ajo ka bërë të ditur se së shpejti do të hapet thirrja për aplikim për përfituesit e programit.