Ministri i Drejtësisë, Toni Gogu, ka deklaruar përpara nisjes së seancës plenare në Kuvend detajet e amnistisë penale që pritet të miratohet. Sipas shifrave zyrtare, zbatimi i kësaj nisme ligjore do të sjellë lirimin e menjëhershëm të 466 personave nga institucionet e vuajtjes së dënimit.
Nga grupi i personave që do të lënë burgjet, përfshihen 11 gra dhe 1 i mitur. Përveç lirimeve, amnistia parashikon edhe ulje të dënimit për 869 të dënuar të tjerë. Në këtë kategori përfshihen 8 gra dhe 8 të mitur.
Ministri Gogu ka nënvizuar se procesi i amnistisë nuk prek asnjë rast që ndodhet nën hetim ose gjykim nga SPAK dhe GJKKO. Përjashtimi i subjekteve të këtij institucioni është pjesë e kriterit të përcaktuar në projektligj.