Kuvendi i Shqipërisë, në seancën e mbajtur në orët e para të mëngjesit të së mërkurës, miratoi emërimin e Ervin Demos si ministër i Brendshëm. Vendimi vjen pas propozimit të kryeministrit Edi Rama dhe dekretimit të tij një ditë më parë nga Presidenti Bajram Begaj.
Në procesin e votimit, pro emërimit u shprehën 83 deputetë të mazhorancës, ndërsa kundër votuan dy deputetë: Erald Kapri nga partia Mundësia dhe Redi Muçi nga Lëvizja Bashkë. Me këtë votim, mbyllet procedura parlamentare për ndryshimin në kabinetin qeveritar.
Ervin Demo pason në këtë post Besfort Lamallarin, i cili tashmë do të angazhohet si këshilltar i kryeministrit Edi Rama. Pas miratimit në Parlament, pritet që Ervin Demo të kryejë betimin zyrtar para Presidentit Bajram Begaj përpara se të marrë plotësisht detyrat e reja në krye të Ministrisë së Brendshme.
Përditësime
Ervin Demo mori zyrtarisht detyrën e ministrit të Brendshëm më 18 shtator, pas betimit para Presidentit Bajram Begaj. Në kuadër të riorganizimit të kabinetit, Ministria e Pushtetit Vendor shkrihet dhe integrohet në strukturën e Ministrisë së Brendshme.