Kuvendi i Shqipërisë ka miratuar me 100 vota pro ndryshimet në Rregulloren e Kuvendit në mbyllje të seancës së së enjtes. Kundër votoi vetëm deputeti Redi Muçi.
Ndryshimet u miratuan me konsensus mes Partisë Socialiste dhe Partisë Demokratike, në zbatim të vendimit të Gjykatës Kushtetuese. Palët ranë dakord për gjashtë ndryshime kryesore.
Seancat plenare ndërpriten pas orës 22:00 me kërkesë të kryetarit të grupit parlamentar dhe rifillojnë ditën pasardhëse. Koha e diskutimeve për deputetët mbetet dhjetë minuta.
Partia Socialiste tërhoqi propozimin për shqyrtim të përshpejtuar të projektligjeve të lidhura me Bashkimin Evropian. Ligjet e integrimit do të shqyrtohen me procedurë normale, përveç rasteve kur qeveria kërkon ndryshe me arsyetim.
Kontrolli parlamentar u forcua. Institucionet duhet t’u përgjigjen kërkesave të deputetëve për informacion. Në rast mosveprimi, Kryetari i Kuvendit ndërhyn. Komisionet parlamentare zhvillojnë mbledhje ose seanca dëgjimore kur kërkohet nga opozita.
Institucionet e pavarura të përmendura në Kushtetutë raportojnë para komisioneve parlamentare. Këto komisione hartojnë projektrezolutë, e cila i kalon më pas Komisionit “Xhafaj”. Masat disiplinore pezullohen automatikisht nëse ankimohet në Byronë e Kuvendit.
Përditësime
Kuvendi miratoi ndryshimet në Rregulloren e Kuvendit me 100 vota pro. Komisioni Xhafaj merr rol qendror me proces të detajuar për rezolutat dhe verifikimin e zbatimit. Kryetarët e komisioneve duhet të thërrasin mbledhje ose seanca dëgjimore brenda dy ditësh. Avokati i Popullit, Prokurori i Përgjithshëm dhe të tjerët mund të paraqesin përmbledhje 10-minutëshe në seancë plenare. 35 deputetë të pranishëm nuk votuan.