Partia Socialiste dhe Partia Demokratike kanë arritur marrëveshje për ndryshimet në Rregulloren e Kuvendit. Burime nga Kuvendi njoftojnë se relatorët e të dyja palëve kanë përfunduar draftin e përbashkët.
Drafti pritet të miratohet zyrtarisht nesër në orën 09:00 gjatë mbledhjes së Këshillit për Rregulloren.
PS është tërhequr nga propozimi për shqyrtim të shpejtë brenda një jave të projektligjeve të kërkuara nga Bashkimi Europian. Ajo ka hequr dorë edhe nga përgjysmimi i kohës së diskutimit në seancë plenare.
PS ka pranuar qëndrimin e PD-së për raportimin e institucioneve kushtetuese në Kuvend dhe për paraqitjen e raporteve vjetore në komisionet përgjegjëse sipas fushës.
PD ka pranuar propozimin që Kryetari i Kuvendit të ndërhyjë kur institucionet nuk u përgjigjen deputetëve. Ai duhet të kërkojë përgjigje brenda pesë ditëve dhe në rast mosreagimi të kërkojë masa disiplinore deri në shkarkim.
Kryetarët e komisioneve do të jenë të detyruar të thërrasin mbledhje ose seanca dëgjimore brenda dy ditëve kur kërkohet nga pakica parlamentare. Seancat plenare do të ndërpriten në orën 22:00 me kërkesë të kryetarit të grupit parlamentar dhe do të rifillojnë ditën pasardhëse.
Masat disiplinore do të pezullohen automatikisht në rast ankimi në Byronë e Kuvendit dhe do të llogariten me ditë kalendarike. Sekretariati i Etikës do të ketë numër të barabartë anëtarësh.
Përditësime
PS dhe PD ranë dakord më 20 maj (e mërkurë) për ndryshimet në Rregulloren e Kuvendit. Propozimi për raportim vetëm në Komisionin Xhafaj u hoq dhe palët sqaruan se afatet do të llogariten në ditë kalendarike, jo në ditë pune.
Këshilli për Mandatet dhe Rregulloren miratoi me konsensus ndryshimet në Rregulloren e Kuvendit. Të dy grupet parlamentare do të kenë 11 këshilltarë politikë secili. Sekretariati i Etikës do të ketë 1 sekretar dhe 5 anëtarë me përfaqësim të barabartë; vota e sekretarit do të jetë vendimtare në rast barazimi. Rregullorja do të votohet sot në seancë plenare.