Kuvendi i Kosovës ka ratifikuar sot projektligjin për marrëveshjen financiare me Agjencinë Franceze për Zhvillim, e cila synon përmirësimin e infrastrukturës universitare dhe sportive në prag të Lojërave Mesdhetare që do të mbahen në vitin 2030. Vendimi është marrë me 95 vota pro, pa asnjë votë kundër dhe pa abstenime.
Ministri në detyrë i Financave, Hekuran Murati, gjatë prezantimit të marrëveshjes, shpjegoi se projekti fokusohet në rinovimin dhe zgjerimin e hapësirave të konvikteve në kampusin e Universitetit të Prishtinës, si dhe në ndërtimin e objekteve sportive në institucione arsimore përreth. Gjatë zhvillimit të lojërave, këto hapësira do të shërbejnë përkohësisht si fshati i atletëve dhe qendra stërvitore. Pas përfundimit të këtij organizimi, infrastruktura e re do të mbetet në shërbim të studentëve dhe banorëve të qytetit.
Sa i përket strukturës financiare, Murati njoftoi se vlera e kredisë është 60 milionë euro, ndërsa ekziston mundësia e përfitimit të një granti shtesë investiv në vlerë prej 10 milionë eurosh.