Në prag të Lojërave Mesdhetare "Prishtina 2030", Ministria e Kulturës e Kosovës arriti marrëveshje me Bankën Evropiane për një kredi afatgjate në vlerë fillestare prej 50 milionë eurosh. Ky fond do të shërbejë për renovimin dhe revitalizimin e plotë të kompleksit të Pallatit të Rinisë dhe Sporteve në Prishtinë, i cili shtrihet në rreth 50 000 metra katrorë.
Kompleksi ka mbetur prej vitesh në gjendje të rënduar, veçanërisht salla e madhe, e cila u djeg rreth 20 vite më parë. Plani parashikon rikthimin e objektit në funksionalitetin e mëparshëm, duke rigjeneruar të gjitha hapësirat, përfshirë sallat sportive dhe ambientet e tjera.
Drejtori i departamentit të transformimeve në Komunën e Prishtinës, Gëzim Kastrati, në një intervistë për KosovaPress, deklaroi se qëllimi kryesor është rikthimi i kompleksit në gjendjen e dikurshme. "Ideja është që ky kompleks, i cili ka qenë dikur, të kthehet në gjendjen që ka qenë. Do të thotë, të revitalizohet, të rigjenerohet me të gjitha premisat, duke filluar nga sallat e ndryshme të sporteve poshtë, edhe salla e madhe e cila është e djegur tash e 20 vite", tha ai, duke shtuar se shoqëria ka detyrimin ta kthejë në atë gjendje.
Sa i përket afateve, Kastrati shprehu optimizëm se faza e projektimit do të përfundojë brenda gjashtë muajsh deri në një vit. Punimet e renovimit pritet të nisin në 2027 dhe të zgjasin jo më shumë se dy vite. Ai përmendi se kompleksi dikur u administrua nga kompania Ramiz Sadiku.
Ky projekt shihet si pjesë e përgatitjeve për Lojërat Mesdhetare, të cilat përfaqësojnë një test për kapacitetet organizative dhe bashkëpunimin institucional të Kosovës.