Kuvendi i Shqipërisë rinis punën të hënën, 18 janar 2026, pas pushimeve të fundvitit. Në orën 11:00 mblidhet konferenca e kryetarëve për të diskutuar ligjet që do të miratohen në tre javët e ardhshme. Pasdite, në orën 17:00, zhvillohet seanca plenare e parë e këtij viti.
Seanca plenare ka karakter kryesisht ceremonial dhe nuk përfshin ligje për miratim. Është parashikuar fjalimi i kryetarit të Kuvendit Niko Peleshi dhe i kryetarëve të grupeve parlamentare. Megjithatë, mbledhja pritet të mbartë konfliktet politike nga fundi i vitit të shkuar.
Partia Demokratike ka deklaruar se nuk do të ketë normalitet në Kuvend derisa të shqyrtohet kërkesa e SPAK-ut për heqjen e imunitetit të zëvendëskryeministres Belinda Balluku. Opozita kërkon miratim të shpejtë të kësaj kërkese. Kryetari Niko Peleshi ka caktuar mbledhjen e Këshillit të Mandateve dhe Imuniteteve për datën 28 janar.
Më 16 dhjetor të vitit të shkuar, Prokuroria e Posaçme kundër Krimit të Organizuar dhe Korrupsionit i kërkoi Parlamentit autorizim për arrestimin e Belinda Balluku, e cila hetohet për akuzën e shkeljes së barazisë në tendera.
Qëndrimi i mazhorancës socialiste mbetet i paqartë. Kryeministri Edi Rama ka sqaruar se vendimi do të merret pasi Gjykata Kushtetuese të shprehet për masën e parë të sigurisë, pezullimin nga detyra.