Ministri i Punëve të Brendshme, Besfort Lamallari, mori pjesë në analizën 6-mujore të punës së Agjencisë së Mbikëqyrjes Policore (AMP). Gjatë fjalës së tij, ministri vlerësoi rolin e këtij institucioni në forcimin e integritetit brenda Polisisë së Shtetit dhe në përmbushjen e standardeve evropiane.
Sipas Lamallarit, rezultatet e punës nuk duhet të vlerësohen vetëm nëpërmjet dokumentacionit, por nëpërmjet funksionimit konkret të institucioneve dhe rritjes së besimit të qytetarëve te shteti. Ministri nënvizoi se forcimi i integritetit në strukturat ligjzbatuese përbën një prej piketave kryesore për ecurinë e negociatave për anëtarësimin e Shqipërisë në Bashkimin Evropian.
Në lidhje me kërkesat e grupkapitullit "Themelorët", Lamallari udhëzoi AMP-në që të jetë më proaktive në identifikimin e shkeljeve. Ai kërkoi intensifikim të punës përmes:
• Analizës së riskut;
• Inspektimeve të vazhdueshme;
• Hetimeve administrative;
• Trajtimit profesional të ankesave të qytetarëve.
Ministri theksoi se çdo hetim dhe çdo rast korrupsioni i ndëshkuar kontribuon drejtpërdrejt në afrimin e vendit me standardet e Bashkimit Evropian.