Besfort Lamallari, ministër i Punëve të Brendshme, prezantoi më 27 prill në Tiranë drejtorin e ri të Agjencisë së Mbikëqyrjes Policore (AMP), Klevis Qose.
Ministri falënderoi drejtorin e deritanishëm Eduart Merkaj për përkushtimin, seriozitetin dhe integritetin e treguar gjatë drejtimit të agjencisë. Ai vlerësoi kontributin e Merkajt në forcimin e rolit të AMP-së dhe konsolidimin e standardeve të llogaridhënies.
Lamallari deklaroi se Klevis Qose merr përgjegjësinë në një moment të rëndësishëm për forcimin e standardeve të integritetit. Drejtuesi i ri duhet të vijojë me përkushtim misionin, duke çuar më tej punën për rritjen e transparencës, forcimin e kontrollit të brendshëm dhe garantimin e standardeve më të larta profesionale në Policinë e Shtetit.
Ministri nënvizoi se angazhimi për vetëpastrimin e Policisë së Shtetit është i panegociueshëm. Kushdo që cenon besimin e qytetarëve dhe uniformën nuk ka vend në radhët e saj. Qeveria do të vijojë forcimin e mekanizmave të kontrollit dhe ndëshkimit për të garantuar një polici të pastër, profesionale dhe në shërbim të qytetarëve.