Ministri i Punëve të Brendshme, Besfort Lamallari, reagoi pas vendimit për shpalljen "person i padëshiruar" të shtetases Ikballe Huduti (Berisha), të cilës i është ndaluar hyrja në territorin shqiptar për një periudhë 15-vjeçare. Ky vendim vjen pas deklaratave të saj publike, në të cilat ajo shprehu vlerësime për udhëheqësin suprem iranian, Mojtaba Khamenei, duke e cilësuar atë si liderin e saj shpirtëror, ndërsa përmendi edhe kryeministrin e Kosovës, Albin Kurti, si liderin e saj politik.
Në një reagim të publikuar në rrjetet sociale, ministri Lamallari sqaroi se shteti shqiptar respekton lirinë e shprehjes dhe të drejtën për të protestuar, por nuk do të tolerojë veprime që nxisin urrejtje ose ekstremizëm. Ai theksoi se Shqipëria, si vend anëtar i NATO-s dhe kandidat për anëtarësim në Bashkimin Evropian, do të vazhdojë të mbrojë rendin publik dhe sigurinë kombëtare.
Sipas ministrit, përzierja e emrit të kryeministrit të Kosovës në këtë kontekst është e papranueshme, duke rikujtuar se shteti iranian është shpallur "shtet terrorist" me konsensus nga Kuvendi i Shqipërisë. Lamallari u shpreh se institucionet nuk merren me protestuesit, por me parandalimin e ideologjive që promovojnë terrorizmin dhe obskurantizmin, duke theksuar se këto bindje nuk kanë vend në shoqërinë shqiptare.