Ministri i Brendshëm, Besfort Lamallari, ka publikuar pamje filmike nga protesta e mbajtur këtë të enjte përpara ndërtesës së Kuvendit. Në këto pamje shihet momenti kur një person me kapele goditet në kokë nga një send i fortë, që dyshohet se është hedhur nga pjesëmarrës të tjerë në të njëjtin tubim.
Përmes një reagimi në rrjetet sociale, ministri Lamallari ka kritikuar drejtuesit e opozitës, duke i akuzuar për qëndrime dyfytyrëse. Sipas tij, ndërsa ata ngrenë pretendime në sallën e Kuvendit, në terren po nxisin akte të dhunshme.
"Ata që dje sokëllinin për skenarë gjakatarë të thikave me helm dhe çadrave pistoletë, pasi vranë me pushkët e shtetit në ditën për diell qytetarë të pafajshëm, sot vënë kujën në Kuvend, pasi kanë fshehur dorën e gurëve që hidhen pas shpinës së vetë protestuesve", u shpreh ministri. Lamallari shtoi më tej se këto akte nuk do të munden ta ndalin rrugëtimin evropian të Shqipërisë.