Ministri i Punëve të Brendshme Besfort Lamallari prezantoi masat konkrete për garantimin e sigurisë gjatë sezonit turistik të vitit 2026. Ai theksoi se rritja e numrit të turistëve deri në 12 milionë kërkon shtim të pranisë policore në të gjithë territorin.
Gjatë periudhës nga 1 korriku deri më 31 gusht do të zhvillohen patrullime 12-orëshe në zonat turistike. Do të ngrihen stacione provizore policore pranë Valbonës, Thethit, Komanit, Tales, Gjirit të Lalzit dhe Ksamil. Policia Detare do të forcojë kontrollin në plazhe.
Në pikat kufitare do të shtohet numri i sporteleve për përpunimin e pasagjerëve. Sistemi e-Gates që funksionon tashmë në Rinas do të vendoset edhe në portet e Durrësit dhe Sarandës për të shkurtuar kohën e hyrjes.
Ministri iu referua edhe aksionit në Sarandë, ku u arrestuan disa efektivë policie për dyshime paligjshmërie. Ai deklaroi se aksioni do të shtrihet në të gjitha qytetet bregdetare dhe se nuk do të tolerohet asnjë rast korrupsioni.
Bashkëpunimi me Guardia di Finanza do të vazhdojë për parandalimin e kultivimit të kanabisit. Nga 1 maji deri më 31 tetor janë planifikuar 200 orë fluturimi me avion që do të transmetojë koordinatat në kohë reale.
Për sigurinë në shkolla është planifikuar zbatimi i projektit Smart City fillimisht në 20 shkolla të Tiranës me kamera të pajisura me inteligjencë artificiale.