Drejtori i Departamentit për Rendin dhe Sigurinë Publike, Dhimitraq Ziu, bëri me dije se në funksion të mbarëvajtjes së sezonit turistik, Policia e Shtetit do të shtojë praninë në terren me 1600 efektivë të marrë nga strukturat e Forcave të Shqiponjave, Policisë Rrugore, Forcave Operacionale dhe Forcave të Sigurisë Kombëtare.
Sipas planit të masave, prania policore do të përqendrohet në akset rrugore me qarkullim të lartë dhe në zonat turistike, të cilat janë vlerësuar nga autoritetet si më të ngarkuara:
• Aksi drejt Lezhës, Shëngjinit dhe Tales;
• Rruga drejt Vlorës, plazhet e Himarës dhe Sarandës;
• Aksi Durrës-Golem dhe Lushnjë-Fier.
Përveç shtimit të patrullave, do të ngrihen stacione policore provizore për të mbuluar si turizmin bregdetar ashtu edhe atë malor, konkretisht në: Valbonë, Theth, Koman, Tale, Gjirin e Lalzit dhe Ksamil.
Ziu theksoi se për ruajtjen e rendit do të përdoren mjete teknologjike të avancuara dhe radarë për të monitoruar trafikun dhe për të parandaluar shkeljet e Kodit Rrugor. Në kuadër të bashkëpunimit ndërkombëtar, policia shqiptare do të realizojë shërbime të përbashkëta me homologët nga Kosova, Italia, Mali i Zi dhe Maqedonia e Veriut, duke mundësuar patrullime të përbashkëta përgjatë sezonit.