Lamine Yamal, ylli 18-vjeçar i Barcelonës, mori Trofeun Mundo Deportivo në ceremoninë e edicionit të 78-të, të organizuar nga gazeta spanjolle Mundo Deportivo, që përkoi me përvjetorin e 120-të të themelimit të saj.
Yamal u vlerësua për thyerjen e rekordeve në moshë të re dhe paraqitjet e nivelit të lartë gjatë sezonit 2024-25, ku Barcelona zhvilloi një sezon shumë të mirë. Ai u rendit i dyti në garën për Topin e Artë dhe fitoi disa çmime individuale të tjera.
Pas marrjes së trofeut, sulmuesi spanjoll foli për mediat dhe konfirmoi besnikërinë ndaj klubit. “Shpresoj të qëndroj këtu gjithë jetën time, aty ku kënaqem çdo ditë, te klubi më i mirë dhe në qytetin më të mirë në botë”, deklaroi ai.
Yamal komentoi edhe ndeshjen çerekfinale të Kupës së Mbretit kundër Albacete-s, që do të luhet së shpejti. “Nesër është një ditë shumë e rëndësishme. Po luftojmë për gjysmëfinalen e Kupës, një trofe që duhet ta fitojmë”, shtoi lojtari, i cili realizoi një gol të mrekullueshëm në ndeshjen e fundit ndaj Elche-s.
Albacete eliminoi Realin e Madridit në raundin e mëparshëm, duke e bërë përballjen interesante për Barcelonën nën drejtimin e trajnerit Hansi Flick.