Kryetari i partisë Shqipëria Bëhet, Adriatik Lapaj, akuzoi Avokatin e Popullit Endri Shabanin se kishte bërë pazar politik për t’u zgjedhur në këtë detyrë, në kurriz të qytetarëve që votuan kundër Edi Ramës. Shabani i kundërshtoi pretendimet, duke thënë se takimet dhe komunikimi me deputetët janë pjesë e detyrimeve të tij institucionale.
Në videot e publikuara në rrjetet sociale, Lapaj shfaqi pamje të Shabanit në një takim me kreun e Grupit Parlamentar të Partisë Socialiste, Taulant Balla, dhe ministrin Andis Salla. Sipas Lapajt, pamjet dëshmojnë për pazare politike në kurriz të votuesve të koalicionit Nisma Shqipëria Bëhet.
Lapaj foli edhe për sistemin zgjedhor, duke thënë se listat janë të mbyllura në masën një të tretën dhe të hapura në masën dy të tretat. Ai tha se nuk kandidoi në listë të mbyllur dhe nuk e vendosi veten në një vend të sigurt, por garoi në listë të hapur. Sipas tij, sistemi dhe firmat e Partisë Demokratike bënë që Shabani të zgjidhej Avokat i Popullit.
Lapaj pretendoi gjithashtu se Edi Rama i kishte kërkuar përfaqësuesve të tij ta bindnin dhe ta joshin që të bëhej, siç u shpreh ai, “dekor i pushtetit”. Në deklaratën e publikuar në video, Lapaj tha se e kishte refuzuar këtë ofertë.
Në reagimin e tij në rrjetet sociale, Shabani tha se raporton çdo muaj në Kuvend dhe se ka detyrim institucional të bashkëpunojë me të gjithë deputetët, pa dallim partie. Ai kundërshtoi paraqitjen e takimit si provë të një pazari dhe tha se edhe Lapaj ishte shfaqur në video duke qeshur e përshëndetur të njëjtët deputetë.
Shabani akuzoi aktivistin e partisë Shqipëria Bëhet, Mevlan Mata, se kishte ardhur me një kameraman pranë banesës së tij, e kishte filmuar dhe fyer ndërsa pinte kafe me prindërit. Ai tha se i njeh Matën që nga shkolla e mesme, ndërsa prindërit e tij të moshuar nuk janë pjesë e debatit politik dhe nuk kanë përgjegjësi publike. Shabani shtoi se kritikat ndaj tij i pranon për shkak të detyrës publike, por kërkoi që familja të mos përfshihet në debat.
Lapaj dhe Shabani i paraqitën qëndrimet e tyre përmes videove dhe reagimeve në rrjetet sociale.