Endri Shabani, Avokati i Popullit, ka njoftuar se ka ndërmarrë masa për monitorimin e protestës së organizuar më 31 janar 2026, në orën 17:00, te Kryeministria nga kreu i partisë Shqipëria Bëhet, Adriatik Lapaj.
Në njoftimin zyrtar thuhet se një ekip vëzhguesish të Avokatit të Popullit është angazhuar në terren. Strukturat përkatëse janë vënë në gatishmëri për të qenë të pranishme, sipas nevojës, në ambientet e komisariateve të policisë dhe institucioneve shëndetësore.
Ky angazhim synon ndjekjen nga afër të çdo veprimi pasues dhe garantimin e respektimit të standardeve ligjore dhe të të drejtave të qytetarëve. Avokati i Popullit do të vijojë monitorimin e situatës dhe do të ushtrojë kompetencat e tij ligjore në përputhje me zhvillimet në terren.
Njoftimi është bërë në kuadër të mandatit kushtetues të institucionit për mbrojtjen e të drejtave dhe lirive themelore të njeriut. Protesta kërkon largimin e kryeministrit Edi Rama për aferat dhe skandalet që përfshijnë qeverinë.
Endri Shabani, ish-drejtues i Nismës Thurrje, ishte në koalicion me Adriatik Lapaj në zgjedhjet e kaluara parlamentare, ku morën një mandat. Lapaj e ka cilësuar Shabanin si vegël të Edi Ramës. Përplasje të mëparshme kanë ndodhur mes mbështetësve të Lapajt dhe autoriteteve për çadrat dhe tendat te bulevardi Dëshmorët e Kombit.