Më 15 tetor 2026, Avokati i Popullit, institucion i drejtuar nga Endri Shabani, njoftoi se kishte dërguar grupe monitorimi në komisariatet dhe drejtoritë e policisë në Korçë, Shkodër dhe Tiranë, si dhe në spitalet ku trajtohen persona të lënduar gjatë protestave. Qëllimi është të verifikohet nëse personave të shoqëruar u garantohen të drejtat themelore. Institucioni tha se do t’i publikojë gjetjet pasi ato të konfirmohen.
Në Komisariatin e Policisë Korçë u shoqëruan 26 persona, prej të cilëve 16 të mitur. Sipas njoftimit, të gjithë janë liruar, ndërsa një pjesë po procedohen në gjendje të lirë.
Në Shkodër, përfaqësues të zyrës rajonale monitoruan Drejtorinë e Policisë, ku u kryen veprime procedurale për katër persona të shoqëruar. Avokati i Popullit tha se kishte administruar ankesat e tyre për trajtimin që nga çasti i shoqërimit nga policia, si dhe pretendimet lidhur me garantimin e të drejtave kushtetuese.
Në Tiranë, një grup pune po monitoron situatën në komisariatet e policisë dhe në spitalet ku trajtohen të lënduarit. Institucioni tha se do të raportojë së shpejti për gjetjet paraprake.
Përveç hetimeve të nisura kryesisht, Avokati i Popullit u bëri thirrje qytetarëve dhe familjarëve të tyre t’i drejtohen institucionit me ankesa individuale për pretendime lidhur me trajtimin nga Policia e Shtetit.