Institucioni i Avokatit të Popullit ka nisur një proces verifikimi lidhur me pretendimet për ushtrim dhune ndaj qytetarëve të ndaluar gjatë protestave të fundit në Tiranë. Pas njoftimit të kësaj të shtune për një rast konkret dhune të pretenduar brenda Bllokut të Sigurisë, institucioni ka dërguar dy ekipe të specializuara në terren: një grup po interviston qytetarin e shtruar në Spitalin e Traumës, ndërsa grupi tjetër po kryen verifikime në ambientet e Bllokut të Sigurisë.
Sipas njoftimit zyrtar, monitorimi ka nisur që nga dita e parë e ndalimeve. Përfaqësuesit e institucionit kanë zhvilluar vizita dhe intervista në komisariatet nr. 1, 2, 3 dhe 4 të kryeqytetit. Nga intervistat e kryera deri të premten, nuk ishte raportuar asnjë ankesë për ushtrim dhune gjatë qëndrimit në ambientet e paraburgimit të Bllokut të Sigurisë.
Në total, deri në këtë moment, janë administruar 10 ankesa zyrtare nga qytetarët, të cilat pretendojnë për tejkalim të forcës nga punonjësit e policisë gjatë procesit të shoqërimit ose ndalimit. Avokati i Popullit bëri të ditur se këto raste janë në proces të verifikimit administrativ dhe, nëse vërtetohen, do të ndiqen me të gjitha mjetet ligjore që parashikon mandati i këtij institucioni. Gjetjet përfundimtare pritet të bëhen publike pas përfundimit të verifikimeve.