Avokati i Popullit ka publikuar një raport paraprak pas protestës së opozitës, të zhvilluar më 22 mars 2026 në Tiranë.
Institucioni monitoroi të gjithë itinerarin e tubimit. Grupi i punës vizitoi spitalet dhe komisariatet për të intervistuar protestuesit e ndaluar ose të lënduar.
Nga të dhënat paraprake, të paktën 12 persona të moshës madhore u ndaluan, ndërsa 4 të mitur u lanë të lirë pas marrjes në pyetje.
Në Spitalin e Traumës, ekipi administroi ankesën e një protestuesi që raportoi ushtrim dhune nga policia. Për këtë ka nisur hetim administrativ. Raporti i detajuar do të publikohet në përfundim të verifikimeve.
Avokati i Popullit inkurajon tubimet paqësore dhe i bën thirrje forcave të rendit për vetëpërmbajtje e profesionalizëm, pavarësisht dinamikës së protestës.
Gjithashtu, thekson domosdoshmërinë për transparencë mbi protokollet e policisë për përshkallëzimin e forcës dhe përdorimin e mjeteve si gazi lotsjellës apo uji për shpërndarjen e turmave.