Vendimi i Komunës së Prishtinës për të larguar sloganin “Free Ukraine” dhe flamurin ukrainas nga objekti i Grand Hotelit, ku kishin qëndruar për rreth katër vjet, ka nxitur reagime të shumta. Veprimi ndodhi pas vizitës së presidentit ukrainas Volodymyr Zelenskyy në Serbi, gjatë së cilës ai deklaroi se qëndrimi i Kievit lidhur me mosnjohjen e shtetësisë së Kosovës mbetet i pandryshuar.
Gazetari Michael Martens e bëri të ditur këtë zhvillim përmes rrjetit social X, duke e lidhur atë me pasojat e vizitës së Zelenskyy-t në Beograd. Lidhur me këtë situatë ka reaguar edhe Michael Roth, ish-ministër i Shtetit për Evropën në Ministrinë e Jashtme të Gjermanisë dhe ish-kryetar i Komisionit për Punë të Jashtme të Bundestagut.
Në një shkrim në platformën X, Roth u shpreh se e kupton zhgënjimin e autoriteteve dhe qytetarëve të Kosovës për shkak të qëndrimit të presidentit ukrainas. Megjithatë, ai e konsideroi të gabuar heqjen e simbolikës ukrainase nga kryeqyteti i Kosovës.
“E kuptoj zhgënjimin e Kosovës. Presidenti Zelensky ende nuk e njeh shtetësinë e saj dhe e thotë këtë gjatë vizitës në Serbi. Kjo dhemb, pa dyshim. Por ulja e flamurit ukrainas në Prishtinë ishte prapëseprapë e gabuar. Kjo minimizon luftën brutale të Rusisë dhe luftën e ukrainasve për liri”, ka theksuar Roth.
Gjatë vizitës së tij në Serbi, presidenti Zelenskyy deklaroi se Ukraina vazhdon të respektojë integritetin territorial të partnerëve të saj dhe falënderoi Serbinë për mbështetjen e saj ndaj integritetit territorial të Ukrainës, duke përfshirë edhe çështjen e Krimesë. Kjo deklaratë shkaktoi pakënaqësi në institucionet e Kosovës, të cilat kërkuan rishqyrtimin e politikës së Kievit ndaj shtetit të Kosovës.