Lidhja Demokratike e Kosovës ka reaguar ndaj asaj që e quan sulm të organizuar kibernetik dhe fushatë të koordinuar manipulimi digjital kundër komunikimit publik të kryetarit të saj, Lumir Abdixhiku, lidhur me thirrjen për "Tubimin e Bashkimit".
Në reagimin e lëshuar për media më 10 maj 2026, LDK-ja thotë se brenda pak minutash mijëra profile të dyshimta dhe llogari automatizuara kanë ndërhyrë në mënyrë të sinkronizuar në rrjetet sociale. Këto veprime synojnë deformimin e perceptimit publik, uljen artificiale të besueshmërisë së komunikimit politik dhe krijimin e një atmosfere të rreme refuzimi e polarizimi në opinionin publik.
LDK thekson se ky nuk është më një debat normal politik, por përpjekje për ta zëvendësuar debatin demokratik me operacione psikologjike dhe propagandistike në hapësirën digjitale. Partia paralajmëron se manipulimi digjital dhe propaganda e organizuar mund të përdoren gjatë fushatës së ardhshme zgjedhore.
Partia opozitare u bën thirrje qytetarëve të Kosovës të jenë të vetëdijshëm ndaj strategjive të manipulimit digjital. Ajo dënon çdo formë të ndërhyrjes hibride në opinionin publik dhe insiston se vullneti qytetar nuk mund të manipulohet nga profile false, rrjete anonime apo mekanizma propagandistikë.
LDK kërkon zgjedhje të lira, debat të ndershëm dhe respektim të standardeve demokratike në Kosovë.