Lidhja Demokratike e Kosovës (LDK) ka njoftuar se sulmet e koordinuara digjitale ndaj profileve zyrtare të kandidatit të saj për kryeministër, Lumir Abdixhiku, kanë vazhduar edhe sonte.
Sipas reagimit të partisë, këto sulme kryhen përmes rrjeteve të profileve të rreme, ndërhyrjeve të automatizuara dhe aktivitetit të sinkronizuar manipulativ, që ngjajnë brenda pak minutash. Kjo veprimtari synon të krijojë artificialisht perceptimin publik dhe të ndërtojë paraprakisht infrastrukturën propagandistike për fushata të ardhshme të atakimit dhe diskreditimit politik.
LDK vlerëson se bëhet fjalë për një formë të organizuar të ndërhyrjes hibride në komunikimin publik dhe procesin demokratik në Kosovë. Partia thekson se Kosova nuk guxon të lejojë zëvendësimin e debatit demokratik me manipulim digjital, propagandë anonime dhe sulme të organizuara ndaj komunikimit politik të lirë.
Për këtë arsye, LDK do ta adresojë çështjen nesër në mëngjes në Policinë e Kosovës dhe institucionet përkatëse, duke kërkuar trajtim serioz, profesional dhe urgjent të këtij aktiviteti të rrezikshëm.
LDK deklaron se asgjë nuk do ta ndalojë komunikimin e saj me qytetarët: as profilet e rreme, as propaganda, as frika nga bashkimi që po ndodh në Kosovë.