Kandidati për kryeministër i Lidhjes Demokratike të Kosovës (LDK), Lumir Abdixhiku, ka bërë thirrje për pjesëmarrje në tubimin final të fushatës zgjedhore. Ky aktivitet do të mbahet të premten, në orën 20:00, në Sheshin Skënderbeu në Prishtinë.
Në thirrjen e tij drejtuar qytetarëve, Abdixhiku ka ftuar mbështetësit që të marrin pjesë së bashku me familjet, miqtë dhe të afërmit. Ai e përshkroi këtë ngjarje si një natë bashkimi dhe shprese, duke theksuar se tubimi do ta përmbyllë rrugëtimin zgjedhor të kësaj partie ashtu siç ka nisur: me unitet dhe besim.
"Të premten, të gjitha rrugët shpijnë tek Sheshi Skënderbeu. Në Prishtinë mblidhemi të gjithë për ta dhënë mesazhin më të madh se Kosova është gati për ndryshim", ka deklaruar Abdixhiku përmes një mesazhi publik. Sipas kandidatit të LDK-së, ky tubim do të pasqyrojë energjinë dhe bindjen e qytetarëve për fillimin e një kapitulli të ri politik në vend.