Anëtari i Kryesisë së Lidhjes Demokratike të Kosovës (LDK), Berat Rukiqi, njoftoi se partia e tij ka përcaktuar pranimin e projektit për gazin amerikan si kusht të panegociueshëm për çdo marrëveshje politike në krijimin e institucioneve të reja.
Në një deklaratë për emisionin "DPT Te Fidani" në Klan Kosova, Rukiqi theksoi se ky është pozicion zyrtar i subjektit të tij. Ai e krahasoi këtë kërkesë me vijat e kuqe që LDK mban ndaj Listës Serbe, duke e bërë pranimin e projektit për gazin amerikan parakusht për çdo bashkëpunim institucional pas zgjedhjeve të zhvilluara më 7 qershor.
"Ne e kemi si pozicion zyrtar dhe politik se në çdo lloj marrëveshje për krijimin e institucioneve të reja ku përfshihet LDK, kemi një kërkesë të panegociueshme. Ashtu siç kemi vijë të kuqe për Listën Serbe, nga ana tjetër, vijë e kuqe është edhe çështja e gazit. Kusht i çdo bashkëpunimi institucional është pranimi i gazit amerikan", u shpreh Rukiqi.