Këngëtarja Leonora Jakupi iu drejtua qytetarëve të mbledhur në sheshin "Skënderbeu" në Prishtinë, në natën e tetë të protestës kundër vendimeve të Dhomave të Specializuara të Hagës. Protesta, e cila zhvillohet nën moton "Jo në emrin tonë", ka mbledhur qytetarë të shumtë në mbështetje të ish-krerëve të Ushtrisë Çlirimtare të Kosovës (UÇK).
Në fjalimin e saj, Jakupi kërkoi unitet mes shqiptarëve kudo që ndodhen, duke u bërë thirrje atyre nga Kosova, Shqipëria, Malësia, Presheva dhe Tetova që të mbështesin këtë kauzë. Ajo i cilësoi ish-luftëtarët e UÇK-së si "ombrellën" e popullit dhe vlerësoi lart sakrificën e tyre për lirinë e vendit.
"Liria nuk falet, ajo duhet fituar. Jemi popull që nuk i frikësohemi drejtësisë, por kërkojmë drejtësi", deklaroi Jakupi, duke u shprehur se proceset gjyqësore duhet të jenë të drejta. Ajo apeloi te qytetarët që të mos lejojnë përçarjet dhe të ruajnë vlerat e luftës, duke theksuar se këto të fundit janë shtylla të historisë së kombit. Në fund të fjalimit, këngëtarja shprehu urimin që "heronjtë" të kthehen sa më parë në shtëpi, duke përsëritur thirrjet për drejtësi dhe për t'i thënë ndal asaj që ajo e konsideroi si padrejtësi ndaj ish-udhëheqësve të UÇK-së.