Lëvizja Vetëvendosje ka arritur në 51 ulëse në Kuvendin e Kosovës, pas përpunimit të rreth 20 për qind të votave të ardhura me postë nga diaspora. Në këtë fazë të numërimit, kjo forcë politike ka siguruar mbështetjen e mbi 69 për qind të votuesve jashtë vendit.
Fillimisht, nga votat e numëruara brenda territorit të Kosovës, Lëvizja Vetëvendosje kishte siguruar 48 mandate. Me shtimin e tri mandateve nga votat e diasporës, është ndryshuar përfaqësimi i forcave të tjera politike. Partia Demokratike e Kosovës (PDK) mban 23 ulëse, Lidhja Demokratike e Kosovës (LDK) ka 19, ndërsa Aleanca për Ardhmërinë e Kosovës (AAK) ka zbritur në 7 ulëse nga 8 sa kishte sipas projeksioneve të mëhershme.
Sipas rezultateve të deritanishme, përqindja e votave për partitë kryesore është:
• Lëvizja Vetëvendosje: 44.6 për qind
• Partia Demokratike e Kosovës: 20.5 për qind
• Lidhja Demokratike e Kosovës: 17.26 për qind
• Aleanca për Ardhmërinë e Kosovës: nën 7 për qind
Komisioni Qendror i Zgjedhjeve (KQZ) ka pranuar rreth 85 mijë zarfe me vota nga diaspora, nga të cilat deri tani janë procesuar të dhënat e rreth 11 mijë votave. Nëse trendi aktual vazhdon, projeksionet tregojnë se Lëvizja Vetëvendosje mund të sigurojë të paktën edhe një mandat shtesë.
Për formimin e qeverisë dhe zgjedhjen e kryetarit të Kuvendit kërkohen minimalisht 61 vota. Ndërkaq, zgjedhja e presidentit kërkon pjesëmarrjen e 80 deputetëve në votim, çështje kjo që shkaktoi bllokim politik dhe çoi në organizimin e zgjedhjeve të parakohshme më 7 qershor.
Përditësime
Procesi i numërimit të votave të diasporës ka arritur në 23%, me 36 nga 57 vendvotimet e përpunuara, që përfaqësojnë rreth 63% të votave me postë. Sipas rezultateve paraprake, Lëvizja Vetëvendosje (LVV) kryeson me 9,119 vota, e ndjekur nga LDK me 2,210, PDK me 876 dhe AAK me 579 vota. Këto rezultate konfirmojnë sigurimin e mandatit të 51-të për LVV-në, duke lënë kandidatin e AAK-së, Bekë Berisha, jashtë Kuvendit.