Robert Lewandowski, sulmuesi polak i Barcelonës, në një intervistë për revistën “Sportweek” të “Gazzetta dello Sport”, zbuloi se Genoa është skuadra e vetme nga Serie A që ka pasur kontakte me të. Kjo ndodhi në vitin 2010, para se ai të kalonte te Borussia Dortmund.
Lewandowski tregoi se në atë kohë, kur luante ende në Poloni, Genoa e ftoi për të parë një ndeshje kundër Sampdorias në “Stadio Luigi Ferraris”, i njohur ndryshe si Marassi. “Isha kurioz të shihja klubin, stadiumin, atmosferën dhe doja të respektoja interesimin e tyre. Ishte hera e vetme që kam pasur kontakte me një klub italian”, tha ai.
Ai theksoi se nuk ka marrë ende vendim për të ardhmen e tij. Sulmuesi do të jetë lojtar i lirë në fund të sezonit 2025-26 dhe spekulimet e fundit në Itali e lidhin me Juventusin dhe Milanin, veçanërisht pas suksesit të Luka Modrić te Milani pas transferimit të lirë nga Real Madridi verën e kaluar.
“Sinqerisht, sot nuk kam asgjë për të thënë. Qëllimi është të arrijmë në fund të sezonit me sa më shumë fitore, gola dhe trofe, pastaj do të shohim. Nuk po mendoj për këtë dhe nuk është prioritet për momentin”, deklaroi Lewandowski.
Sa i përket futbollit italian në vitin 2026, ai vlerësoi se kampionati është shumë konkurrues. “Zakonisht ka garë të fortë dhe nuk fiton gjithmonë e njëjta skuadër. Skuadra si Juventusi dhe Interi kanë arritur në finalet e Ligës së Kampionëve në vitet e fundit”, përfundoi ai.