Operacioni i shpëtimit është finalizuar me sukses në zonën malore mbi Kalanë e Lezhës, ku një 71-vjeçar kishte mbetur i bllokuar. I moshuari po ruante bagëtitë në këtë zonë kur, si pasojë e një rrëzimi, pësoi dëmtime që ia bënë të pamundur lëvizjen.
Pas marrjes së njoftimit, shërbimet e Policisë së Lezhës në bashkëpunim me ekipin e urgjencës të Spitalit Rajonal të Lezhës ndërhynë menjëherë për t’i dhënë ndihmë të moshuarit. Ekipet bënë të mundur nxjerrjen e tij nga terreni i vështirë dhe transportimin për në spitalin rajonal.
Në Spitalin Rajonal të Lezhës, i dëmtuari mori ndihmën e parë mjekësore. Megjithatë, për shkak të gjendjes së tij shëndetësore dhe nevojës për trajtim më të specializuar, 71-vjeçari u dërgua me urgjencë drejt Spitalit të Traumës në Tiranë.