Grupet e organizuara kriminale nga Ballkani kanë lidhje me Venezuelën, siç dëshmojnë rastet e sekuestrimit të kokainës, arrestimeve dhe procedurave gjyqësore të përfunduara ose në zhvillim. Këto grupe janë identifikuar nga organizata ndërkombëtare si EUROPOL dhe INTERPOL si aktorë kryesorë në trafikimin e kokainës nga shtetet e Amerikës Latine drejt Evropës.
Venezuela ka ardhur në qendër të vëmendjes ndërkombëtare si shtet transit për trafikimin e kokainës pas arrestimit të udhëheqësit të rrëzuar Nicolas Maduro nga forcat e Shteteve të Bashkuara në fillim të janarit. Maduro do të përballet me gjykim në SHBA bazuar në një aktakuzë që e ngarkon me mbikëqyrje të një rrjeti të tregtisë me kokainë, i cili ka bashkëpunuar me grupe të dhunshme si kartelet meksikane Sinaloa dhe Zetas, rebelët majtistë kolumbianë të FARC-ut si dhe banda venezuelane Tren de Aragua. Në seancën e parë dëgjimore në një gjykatë në Nju Jork, Maduro mohoi akuzat.
Sipas Sasha Gjorgjeviq nga Nisma Globale për Luftimin e Organizatave Kriminale Transnacionale (GI-TOC), Venezuela përbën një korridor strategjik dalës nga Amerika Latine drejt Atlantikut për kontrabandën e kokainës, në të cilën janë të përfshira rrjete nga Ballkani Perëndimor. Nga atje, kokaina dërgohet direkt në Evropë ose përmes Afrikës Perëndimore. Megjithatë, për grupet kriminale ballkanike, Venezuela nuk është destinacioni kryesor; vende si Kolumbia, Brazili dhe së fundmi Ekuadori janë më të rëndësishme.
Arrestimi i Maduro-s dhe veprimet e SHBA-së kundër grupeve kriminale nuk do të kenë ndikim të madh, sipas Gjorgjeviqit, pasi këto grupe janë fleksibël dhe do të gjejnë rrugë alternative. Anëtarët e tyre kanë origjinë nga vendet e Ballkanit dhe kanë baza më të rëndësishme në vende të tjera.
Shembuj të lidhjeve
Një rast i dukshëm është sekuestrimi i 5 tonë kokainë pranë bregut të Arubës, afër Venezuelës, në shkurt 2020. Marina holandeze ndaloi anijen Aressa, e cila ishte ankoruar më parë në portin venezuelan të Guaranos. Gjatë aksionit u arrestuan 11 shtetas të Malit të Zi, pjesë e ekuipazhit. Sipas Drejtorisë së Policisë së Malit të Zi, ky sekuestrim ishte rezultat i bashkëpunimit ndërkombëtar.